Y Casgliad

Archif Ymchwil Hughesovka

Mae Archifau Morgannwg wedi casglu ynghyd lawer o gofnodion yn ymwneud â Hughesovska yn Archif Ymchwil Hughesovka.  Mae’n cynnwys deunyddiau am John Hughes a’i deulu, y gweithfeydd a’r dref, y teuluoedd o Brydain oedd yn byw yno, a mwy – gan gynnwys cannoedd o ffotograffau gwefreiddiol. Mae’r casgliad yn adlewyrchu llwyddiannau un o’r ymfudwyr Cymreig talentog a sefydlodd ac a ddatblygodd ddiwydiannau ym mhedwar ban byd.

Mae crynodeb o’r casgliadau  sy’n ymwneud â Hughesovka ar gael. Mae llawer o gasgliadau Hughesovka hefyd yn cael eu rhestru yn ein catalog

Gwaed Morgannwg: Rhydwelïau Tywyll, Hen Wythiennau

Derbyniodd Archifau Morgannwg gyllid gan y Wellcome Trust i gatalogio eu cofnodion o’r diwydiant glo yn ne Cymru. Cefnogwyd ein harddangosfa ‘Glamorgan’s Blood’ gan Lywodraeth Cymru trwy Gyngor Archifau a Chofnodion Cymru. Lansiwyd yr arddangosfa yn Hydref 2019 ac roedd ar gael i’w weld yn Archifau Morgannwg tan ddiwedd y flwyddyn.

Roedd disgwyl i’r arddangosfa teithio i leoliadau ar draws de Cymru yn ystod 2020. O ganlyniad i’r pandemig Covid-19 bu’n rhaid i ni ddod a’r daith i ben, dim ond ychydig fisoedd ar ôl dechrau.  Mae’r baneri nawr wedi eu cadw nes bod modd i ni ail-gychwyn ar y daith.

Yn y cyfamser, rydym wedi ychwanegu cynnwys yr arddangosfa i’n gwefan fel bod modd ei weld a’i fwynhau o adref.