HYFFORDDAI CORFFORAETHOL – CYNORTHWY-YDD DIGIDOL (ARCHIF)

Mae Archifau Morgannwg am gyflogi Hyfforddai Corfforaethol i gyfrannu at ein gwasanaeth gan ein helpu ni i gasglu a chadw dogfennau am hanes Morgannwg sy’n dyddio o’r 12fed ganrif hyd heddiw a’u gwneud ar gael i’r cyhoedd. Mae dros 12 mil o ddogfennau wedi eu cadw mewn ystafelloedd diogel yn y cyfleuster a adeiladwyd yn bwrpasol.

Yn y rôl Hyfforddai Corfforaethol hon, byddwch yn dysgu:

• Gynhyrchu copïau digidol o ansawdd uchel o ddeunydd archif o gasgliad Archifau Morgannwg
• Golygu delweddau digidol, gan gynhyrchu copïau sy’n addas at amrywiaeth o ddibenion
• Uwchlwytho cynnwys digidol a metadata cysylltiedig i byrth darganfod ar-lein
• Ymateb i geisiadau cwsmeriaid am gopïau digidol o ddeunydd yn y casgliad
• Datblygu sgiliau gwasanaeth cwsmeriaid drwy e-bost
• Ymdrin â deunydd archif gwreiddiol yn briodol

I gefnogi’ch datblygiad, byddwch yn cael goruchwyliaeth a hyfforddiant yn y swydd, gan gynnwys hyfforddiant llawn ar ddefnyddio ein hoffer delweddu digidol arbenigol a’n systemau TG, i’ch helpu i ddarparu gwasanaeth effeithlon ac effeithiol mewn modd cadarnhaol sy’n canolbwyntio ar y cwsmer. Byddwch hefyd yn cael eich cefnogi gan fentor a enwir a fydd yn eich annog i ddatblygu ystod o sgiliau trosglwyddadwy i gefnogi dilyniant eich gyrfa.

Bydd y rôl hon wedi’i lleoli ar y safle, yn adeilad Archifau Morgannwg yn Lecwydd, Caerdydd.

Dysgwch fwy a gwnewch gais ar Dudalen Swyddi Cyngor Caerdydd.

Nid yw’n bosib i ni gynnig lleoliadau gwirfoddoli a phrofiad gwaith newydd ar hyn o bryd.  Byddwn yn diweddaru’r dudalen hon wrth i’r sefyllfa newid.

Os ydych chi’n gallu gwirfoddoli am ddiwrnod cyfan, neu am fore neu brynhawn bob wythnos, gallwn gynnig cyfle gwych i chi gael profiad uniongyrchol o waith archifo neu gadwraeth.

Mae myfyrwyr prifysgol a phobl sydd wedi ymddeol ymhlith gwirfoddolwyr yr Archifau, oll yn cyfrannu o’u hamser at waith yr archifau. Mae eu gwybodaeth leol neu sgiliau arbenigol yn gwneud cyfraniad mawr at waith y staff.

Ar hyn o bryd, mae ein gwirfoddolwyr yn gweithio ar nifer o brojectau, yn casglu gwybodaeth o gofnodion sy’n ymwneud â’r Rhyfel Byd Cyntaf, er enghraifft, yn creu mynegai o gofrestri lluniau’r heddlu, yn glanhau a thrawsysgrifio cytundebau criwiau llongau oedd wedi eu cofrestru yng Nghaerdydd ac yn creu cronfa ddata o gynlluniau adeiladau, y bydd modd eu cyrchu o’n hystafell chwilio gyhoeddus